《動物森友會秘技》
疫情之下，打機已經成為最大娛樂，一部Switch由二千幾變成四千先有交易，可以係屋企減肥嘅Ring Fit都由七百幾炒到千幾蚊，而最近大熱嘅動物森友會都唔例外，炒炒炒。
老婆佢好少打機，但因為悶到極點，所以係朋友說服下都成為動森一份子，以前我係佢面前打機係罪，依家佢打機時我亦打，大家河水不犯井水，樂也融融。
尋日網上見到有篇文，教人用兩分鐘可以刷到十萬蚊遊戲幣，我望一望，原來係調校時間再賺利息，睇落係可行，我雖然無玩，但睇住老婆佢日日煲，都好清楚遊戲係點玩，咁樣去賺錢，我真係覺得完全無遊戲體驗。
諗起以前睇過一個故事，講一個漁夫佢係海邊釣魚，然後有個商業奇才同佢講，你依家咁日日釣魚，不如買隻新船，請幾個人幫你釣，然後賺到錢再買再請再釣，好快你就可以家財萬貫，漁夫最後問，咁當我好有錢時，有咩好處，奇才答佢，咁你就可以每日都好悠閒地釣魚享受人生喇。
漁夫反問佢，呢樣野唔係我依家已經做緊咩？
作為一個故事，佢可能想大家反思好多野都會被錢財所影響，最後你失去咗人生樂趣，但放係剛剛小秘技上面，有好多錢之後，遊戲仲有乜好玩呢？當你有無限金錢時，你將個島建造成最完美嘅樂園，然後就係結束之時。
好多年前，報攤會賣「金手指」，即係你入一段野落去，就可以得到唔同技能、金錢、通關等等，都曾經有好多人會用金手指去打機，但最後有冇遊戲體驗？無，因為你越過咗遊戲本質，就係要你去努力玩，而過程之中，你慢慢打出嚟嘅先係屬於自己。
仲記得有一晚老婆佢同兩個朋友相約睇流星（係動森入面），我完全係呆咗咁睇，一個晚上幾個鐘，佢哋收集星星碎片，一路吹水一路等，一有流星就㩒制，當佢去沖涼時，我就要幫佢睇住個天，有星就㩒。
呢個過程，係好低能，但亦係一種青春回憶，得到碎片係其次，大家一齊玩一齊進步先係最難能可貴嘅事。
當我同老婆講呢個秘技時，佢一句同我講，咁有乜好玩呢？
遊戲之中，你一直堅持去做重覆又重覆嘅釣魚劈樹捉蟲等等，期待嘅係一種驚喜，你唔知下一次釣嘅會唔會係從來未見過嘅新品種，慢慢去儲圖鑑，慢慢令博物館豐富起來，買衫換衫然後去朋友島度玩，一切一切都係樂趣。
係，搵錢，係好辛苦嘅事，有錢總好過無錢，但當你突然有一大筆錢時，有好多觀念都會唔同咗，咁你一直做嘅事又意義何在呢？
試想想，遊戲你乜都有，想點就點，完成所有成就都好，但只有你一個人，無人可以分享，呢隻遊戲，又有乜好玩次處。
疫情之下，大家好耐無見，有一個平台俾到大家吹水玩玩，返返去當年青春時代，先係呢種遊戲最令人著迷嘅地方。
我教大家一種「真．秘技．朋友召喚」會令你有更好遊戲體驗，就係@你朋友，今晚過嚟我個島度玩啦！
－－－－－－－－－－－－－－－－－－－－－－－－－
支持本土創作，如果有其他朋友想買書的話，都歡迎點擊下方連結下單。
《弊傢伙，我女朋友有咗》試讀：https://www.facebook.com/Maydreaming/photos/a.278579888904333/1115173785244935/?type=3&theater
預購 BY Payme, FPS, Alipay連結：https://forms.gle/UEdH32PfVD2cp5nK6
預購By 掌鋪，可以使用Visa Master Card連結：
https://maydreaming.boutir.com/i/WDnmnPAAA
Search